Tədbirdə Dövlət Dəniz və Liman Agentliyinin (DDLA), “Azərbaycan Xəzər Dəniz Gəmiçiliyi” QSC-nin (ASCO) nümayəndələri, şəhid ailələrinin üzvləri, Vətən müharibəsi iştirakçıları və qazilər iştirak ediblər.

Əvvəlcə Azərbaycanın ərazi bütövlüyü və suverenliyi uğrunda canlarından keçən Vətən övladlarının xatirəsi bir dəqiqəlik sükutla yad edilib, sonra Azərbaycan Respublikasının Dövlət Himni səsləndirilib.

Çıxışlarda bildirilib ki, Vətən müharibəsində qazanılmış tarixi Qələbə Ulu Öndər Heydər Əliyevin müəyyən etdiyi dövlətçilik strategiyasının Prezident İlham Əliyev tərəfindən uğurla davam etdirilməsi, ölkənin iqtisadi və hərbi qüdrətinin artırılması, xalqımızın birliyinin nəticəsidir.

Həmçinin, Zəfərdən sonrakı dövrə toxunularaq Qarabağ və Şərqi Zəngəzurda genişmiqyaslı bərpa və quruculuq işlərinin həyata keçirildiyi diqqətə çatdırılıb, Böyük Qayıdışın təmin edilməsi istiqamətində görülən işlərdən danışılıb.

Şəhid Pərviz Məmmədovun atası, ASCO-nun Zığ Gəmi Təmiri və Tikintisi Zavodunun əməkdaşı Ələddin Məmmədov çıxışında tarixi Qələbənin əldə olunmasında dövlətimizin qətiyyətli siyasətindən və Azərbaycan Ordusunun qəhrəmanlığından danışıb.

ASCO-nun Məxfi rejim və hərbi səfərbərlik şöbəsinin rəis müavini, Vətən Müharibəsi Qəhrəmanı Zaur Hüseynov tədbir iştirakçıları ilə xatirələrini bölüşüb. O, Ali Baş Komandan cənab İlham Əliyevin rəhbərliyi ilə Zəfərin əldə olunmasında əsgər və zabitlərimizin şücaətinin, xalqımızın həmrəyliyinin,  Vətənə bağlılığın mühüm rolunu vurğulayıb.

Tədbir çərçivəsində Vətən müharibəsində iştirak etmiş ASCO əməkdaşı Altay Həsənli haqqında videoçarx nümayiş etdirilib. Həmçinin ASCO-da çalışan müharibə iştirakçılarının “Heydər zirvəsi”nə yürüşündən hazırlanmış sənədli film təqdim olunub.

Zəfər Günü tədbiri “Dənizi səngərə dəyişənlər” adlı videoçarxın nümayişi ilə yekunlaşıb.

Videoçarxda Xəzərin sərt dalğaları ilə mübarizə aparan dənizçilərin Vətən çağırışına səs verərək silaha sarılmaları, torpaqlarımızın azadlığı uğrunda döyüşlərdə göstərdikləri qəhrəmanlıq və Zəfərə gedən döyüş yolları əks olunub.