Dövlət Dəniz və Liman Agentliyində “Vahid Dənizçilik Pəncərəsi” sisteminin təkmilləşdirilməsi məqsədilə texniki dəstək üçün Avropa Dəniz Təhlükəsizliyi Agentliyi (EMSA) tərəfindən ekspert kimi cəlb edilən Monteneqronun Dəniz Administrasiyasının sədr müavini Nexhat Kapidani ilə görüş olub.

Agentliyin İdarə Heyətinin sədr müavini Eldar Məcidov bildirib ki, “Vahid Dənizçilik Pəncərəsi” sisteminin təkmilləşdirilməsi ilə bağlı 2025-ci ildə Brüssel şəhərində Azərbaycanla Avropa İttifaqı arasında Yüksək Səviyyəli Nəqliyyat Dialoqunun 2-ci iclasında müzakirələr aparılıb.

Texniki dəstəyin mümkün istiqamətləri, həmçinin  Avropa Komissiyasının Nəqliyyat və Mobillik üzrə Baş Direktorluğunun (DG MOVE) və Avropa Dəniz Təhlükəsizliyi Agentliyinin nümayəndələri ilə nəzərdən keçirilib.

Eldar Məcidov Avropa Dəniz Təhlükəsizliyi Agentliyinin Qara dəniz və Xəzər dənizi regionu ölkələri üçün həyata keçirdiyi ikinci layihə (BCSEA II) çərçivəsində “Vahid Dənizçilik Pəncərəsi” sistemi ilə bağlı texniki dəstəyin göstərilməsinə razılıq verildiyinə görə təşəkkürünü bildirib.

Görüşdə “Vahid Dənizçilik Pəncərəsi” sisteminin hazırlanması, tətbiqi, sistemdən istifadə edən dövlət orqanları (qurumları) barədə məlumat verilib.

Qeyd olunub ki, bu il iyunun 1-dən etibarən “Vahid Dənizçilik Pəncərəsi sistemi beynəlxalq səfərlər həyata keçirən Azərbaycan Respublikasının Dövlət bayrağı altında üzən gəmilərə də şamil edilib.

Monteneqronun Dəniz Administrasiyasının sədr müavini Nexhat Kapidani göstərilən etimada görə minnətdarlığını ifadə edib.

Qonaq “Vahid Dənizçilik Pəncərəsi” sisteminin təkmilləşdirilməsi məqsədilə Dövlət Gömrük Komitəsi, Dövlət Sərhəd Xidməti, Fövqəladə Hallar Nazirliyi, Bakı Beynəlxalq Dəniz Ticarət Limanı, Bakı-Hövsan Beynəlxalq Ticarət Dəniz Limanı, gəmi agentləri  və şirkət nümayəndələri ilə də müzakirələr aparıb.