Dəniz Vağzalı Kompleksində Bakı Limanı ilə Dövlət Dəniz və Liman Agentliyinin tərəfdaşlığı çərçivəsində “HEYDƏR ƏLİYEV İRSİ: Bakı Limanının inkişaf dövrü” adlı tədbir keçirilib.

Açılış nitqi ilə çıxış edən Bakı Limanının Baş direktoru Taleh Ziyadov Ümummilli Lider Heydər Əliyevin Bakı Limanının inkişafındakı xidmətlərindən və onun əbədiyaşar irsinin Bakı Limanının fəaliyyətində daim yaşayacağından bəhs edib. Qeyd edib ki, bu gün Bakı Limanı beynəlxalq səviyyədə tanınırsa, bu inkişafın təməli Ulu Öndər Heydər Əliyev tərəfindən qoyulub və bu siyasi kurs cənab Prezident İlham Əliyev tərəfindən uğurla davam etdirilir.

Dövlət Dəniz və Liman Agentliyinin sədri Arif Məmmədov Ümummilli Liderin Azərbaycan dövləti və xalqı qarşısındakı misilsiz xidmətləri barədə danışıb. Bildirib ki, bu gün ölkəmizin qüdrətli yüksəlişi, inkişafı Heydər Əliyevin müdrik ideyalarının təntənəsidir. Diqqətə çatdırıb ki, dahi şəxsiyyət Azərbaycana rəhbərlik etdiyi bütün dövrlərdə dəniz nəqliyyatı sahəsinə də xüsusi diqqət göstərib və onun rəhbərliyi ilə atılan addımlar bu sahənin inkişafında müstəsna rol oynayıb. Məhz Ulu Öndərin hakimiyyəti illərində Azərbaycanda dəniz nəqliyyatı sahəsinin inkişafı üçün möhkəm hüquqi, maddi-texniki baza formalaşdırılıb. Müzəffər Ali Baş Komandan, cənab Prezident İlham Əliyevin rəhbərliyi ilə bu möhkəm təməllər üzərində dəniz nəqliyyatı sahəsi yeni bir inkişaf mərhələsinə qədəm qoyub. Azərbaycanın beynəlxalq nəqliyyat qovşağında mövqeyinin daha da möhkəmləndirilməsi istiqamətində strateji addımlar atılıb. Bu mühüm addımlara misal olaraq Xəzər dənizində ən böyük ticarət limanı olan Bakı Beynəlxalq Dəniz Ticarət Limanı yaradılıb, yeni Gəmiqayırma zavodu inşa edilib. Vaxtında atılan mühüm strateji addımlar sayəsində Azərbaycan Avropa ilə Asiya arasında nəqliyyat və logistika qovşağına, Şərqdən Qərbə, Şimaldan Cənuba gedən kommunikasiyaların keçdiyi əsas nəqliyyat dəhlizinə çevrilib.

Tədbirdə çıxış edən millət vəkili Nigar Arpadarai bu gün Azərbaycanın regionda nəqliyyat qovşaqları və beynəlxalq nəqliyyat dəhlizləri üçün mühüm tranzit nöqtəsi olmasını məhz Ulu Öndər Heydər Əliyevin uzaqgörən siyasətinin nümunəsi kimi qiymətləndirib.

Bakı Dəniz Vağzalının sabiq rəhbəri Fikrət Teymurov və qocaman limançı Rafael Mirqulamov Ulu Öndər Heydər Əliyevlə bağlı xatirələrini bölüşüb.

Sonda qonaqlar Ümummilli Lider Heydər Əliyevin Bakı Limanının yenidən qurulması və inkişafındakı əvəzsiz xidmətlərindən bəhs edən filmə baxıblar.

Tədbir çərçivəsində Bakı Limanı, eyni zamanda Dövlət Dəniz və Liman Agentliyi tərəfindən təqdim edilən unikal fotolardan ibarət sərgi də nümayiş olunub.