25 İyun – Dənizçi
Günü münasibətilə Dövlət Dəniz və Liman Agentliyinin və “Azərbaycan Xəzər Dəniz
Gəmiçiliyi” QSC-nin (ASCO) rəhbərliyi və əməkdaşları Fəxri Xiyabana gələrək xalqımızın
Ümummilli Lideri Heydər Əliyevin əziz xatirəsini yad edib, məzarı önünə əklil
qoyublar.
Sonra Şəhidlər
Xiyabanına gələn ziyarətçilər Azərbaycanın müstəqilliyi və ərazi bütövlüyü
uğrunda mübarizədə canlarından keçən qəhrəman Vətən övladlarının, o cümlədən I
Qarabağ müharibəsində şəhid olan dənizçilərin xatirəsini ehtiramla yad ediblər.
Bu gün münasibətilə
keçirilən tədbirdə rəqəmsal inkişaf və nəqliyyat nazirinin müavini, ASCO-nun
Müşahidə Şurasının üzvü Rəhman Hümmətov dənizçiləri peşə bayramı münasibətilə
təbrik edib. Bildirib ki, Azərbaycanda dənizçilik zəngin ənənələrə və tarixə
malikdir: “Milli gəmiçiliyimiz şərəfli inkişaf yolu keçib və bu inkişafın əsas
dövrü Ulu Öndər Heydər Əliyevin ölkəmizə rəhbərlik etdiyi illərə təsadüf edib.
Bu gün isə onun missiyasını cənab Prezident İlham Əliyev uğurla davam etdirir.
Dəniz nəqliyyatı sahəsi ilə əlaqədar mühüm islahatlar aparılır, geniş
infrastruktur layihələri icra olunur, qanunvericilik bazası təkmilləşdirilir,
milli kadrların hazırlanması prosesinə xüsusi diqqət ayrılır. Ölkə başçısının
birbaşa dəstəyi ilə donanmaların tərkibinin yeni gəmilərlə zənginləşdirilməsi
istiqamətində də böyük işlər görülür. Bu günlərdə alınan “Aframax” tipli nəhəng
gəmilər bunun ən bariz nümunəsidir”.
“Azərbaycanın
bugünkü sürətli inkişafında dəniz nəqliyyatı işçilərinin xüsusi əməyi var.
Gəmiçilər həm yük daşımalarda, həm də dənizdə neft-qaz hasilatında mühüm rol
oynamaqla, iqtisadi siyasətə mühüm töhfə verirlər”, – deyə Rəhman Hümmətov
çıxışının sonunda vurğulayıb.
Peşə bayramı
münasibətilə bütün dəniz nəqliyyatı işçilərini təbrik edən ASCO-nun İdarə
Heyətinin sədri Rauf Vəliyev Dənizçi Gününün üçüncü ildir ki, Müzəffər Ali Baş
Komandan cənab İlham Əliyevin rəhbərliyi ilə Vətən müharibəsində qazanılmış
parlaq zəfərimizin yaşatdığı qürur hissi ilə qeyd olunduğunu bildirib.
Rauf Vəliyev 165
illik tarixi olan Azərbaycan gəmiçiliyinin keçdiyi şərəfli inkişaf yolundan
danışıb və bu sahədəki hazırkı inkişafın Ulu Öndər Heydər Əliyevin adı ilə
bağlı olduğunu diqqətə çatdırıb. Qeyd edib ki, Ümummilli Lider ölkəmizə
rəhbərlik etdiyi bütün dövrlərdə gəmiçiliyi daim diqqətdə saxlayıb,
dənizçilərdən öz qayğısını əsirgəməyib. Bu gün onun layiqli davamçısı cənab
Prezident İlham Əliyevin rəhbərliyi ilə gəmiçilik sahəsində genişmiqyaslı layihələr
həyata keçirilir, donanmalar yeni gəmilərlə zənginləşdirilir.
Çıxışlardan sonra bu
il 15 İyun – Milli Qurtuluş Günündə yeni istifadəyə verilmiş “Aframax” tipli
“Şuşa” tankeri haqqında video təqdim olunub.
Tədbirdə Dənizçi
Günü münasibətilə Dövlət Dəniz və Liman Agentliyi tərəfindən “Dəniz
Donanmasının fəxri işçisi” və “Uzaq səfərlər kapitanı” döş nişanlarına layiq
görülənlərin adları açıqlanıb.
Həmçinin “Suraxanı”
gəmi-muzeyinin eksponatları əsasında hazırlanan “Dənizçilik əlifbası” kitabı
təqdim olunub.
Tədbir
maraqlı konsert proqramı ilə davam edib.