Milli Müdafiə Universitetində keçirilən “Strateji araşdırmalar və dövlət müdafiəsinin idarə edilməsi” üzrə növbəti kurs çərçivəsində 14 dövlət orqanı əməkdaşlarının, habelə Türkiyə və Pakistan Silahlı Qüvvələrinin yüksəkrütbəli hərbi qulluqçularının iştirakı ilə Dövlət Dəniz və Liman Agentliyinə ziyarət təşkil olunub.

Ziyarətdə ümumilikdə 26 nəfər iştirak edib. Onlardan 12-si Müdafiə Nazirliyinin, 11-i digər dövlət qurumlarının nümayəndələri olub. 2 nəfər Türkiyə, 1 nəfər isə Pakistan Silahlı Qüvvələrini təmsil edib.

Kursun proqramına uyğun olaraq, ilkin mərhələdə İnsan resursları departamentinin direktoru vəzifəsini müvəqqəti icra edən Nərmin Nəbiyeva Dövlət Dəniz və Liman Agentliyinin yaranma və inkişaf tarixi, missiyası, dəyərləri, təşkilati strukturu, fəaliyyət istiqamətləri, həmçinin dəniz üzgüçülüyünün təhlükəsizliyi, dənizdə insan həyatının və sağlamlığının qorunması, dəniz ətraf mühitinin mühafizəsi sahəsində görülən tədbirlər barədə ətraflı məlumat verib.

Sonra Gəmi Hərəkətinin İdarəedilməsi Mərkəzinin direktoru Məzahir Niftiyevin rəhbərliyi ilə mərkəzlə tanışlıq keçirilib, iştirakçıların sualları cavablandırılıb.