Dövlət Dəniz və Liman Agentliyi tərəfindən dənizçilərə sertifikatların (diplomların) verilməsi üçün “Dənizçilərin hazırlanmasına, onlara diplom verilməsinə və növbə çəkməyə dair” 1978-ci il tarixli, əlavələr edilmiş Beynəlxalq Konvensiyanın təhsilə dair tələblərinin icrası ilə bağlı
TƏLİMAT
1. “Dövlət Dəniz və Liman Agentliyi tərəfindən dənizçilərə sertifikatların (diplomların) verilməsi üçün “Dənizçilərin hazırlanmasına, onlara diplom verilməsinə və növbə çəkməyə dair” 1978-ci il tarixli, əlavələr edilmiş Beynəlxalq Konvensiyanın (bundan sonra – Konvensiya) təhsilə dair tələblərinin icrası ilə bağlı” Təlimat (bundan sonra – Təlimat), Konvensiyanın təhsilə dair tələblərinin icrasının təmin edilməsi məqsədilə hazırlanmışdır.
2. Təlimat, Dövlət Dəniz və Liman Agentliyi (bundan sonra - Agentlik) tərəfindən dənizçilərin sertifikatlaşdırılması zamanı Konvensiyanın təhsilə dair tələblərinin icrası ilə bağlı qarşıya çıxan uyğunsuzluqların və ziddiyyətlərin beynəlxalq və milli qanunvericiliyə uyğun şəkildə tənzimlənməsi üçün tətbiq ediləcəkdir.
3. Dənizçilərə sertifikatların (diplomların) verilməsi və yenilənməsi Konvensiya ilə, habelə milli qanunvericiliklə müvafiq vəzifələr üzrə müəyyənləşdirilmiş digər tələblər nəzərə alınmaqla, təhsil haqqında həqiqi dövlət sənədi əsasında həyata keçirilir.
4. Dənizçilərə sertifikatların (diplomların) verilməsi üçün Konvensiyanın təhsilə dair tələbləri aşağıda göstərilən qaydada tətbiq edilir:
- 4.1. Dənizçilik ixtisasları üzrə orta ixtisas təhsilli şəxslərə münasibətdə:
- 4.1.1. ilk dəfə müraciət edənlərə yalnız köməkçi və istismar səviyyələri üzrə sertifikat (diplom) verilir;
- 4.1.2. əvvəllər köməkçi, istismar və idarəetmə səviyyələri üzrə verilmiş sertifikatlar (diplomlar) yenilənir;
- 4.1.3. idarəetmə səviyyəsi üzrə vəzifə artımına icazə verilmir;
- 4.2. Hərbi dənizçilik təhsilli şəxslərə münasibətdə:
- 4.2.1. ilk dəfə müraciət edənlərə sertifikat (diplom) verilmir;
- 4.2.2. əvvəllər köməkçi, istismar və idarəetmə səviyyələri üzrə verilmiş sertifikatlar (diplomlar) yenilənir;
- 4.2.3. vəzifə artımına icazə verilmir;
- 4.3. Agentlik tərəfindən təsdiq edilməyən proqramlar əsasında sıravi heyət hazırlığı kurslarını bitirmiş şəxslərə münasibətdə:
- 4.3.1. ilk dəfə müraciət edənlərə sertifikat (diplom) verilmir;
- 4.3.2. əvvəllər köməkçi səviyyə üzrə verilmiş serifikatlar (diplomlar) yenilənir;
- 4.3.3. köməkçi səviyyə üzrə vəzifə artımına icazə verilir;
- 4.4. Dənizçilik ixtisası üzrə hər hansı təhsilə dair sənəd təqdim edilmədən əvvəllər verilmiş sertifikatlar (diplomlar) yenilənmir, vəzifə artımına icazə verilmir;
- 4.5. Həqiqiliyi təsdiq edilməyən təhsil sənədi əsasında əvvəllər verilmiş sertifikatlar (diplomlar) yenilənmir, vəzifə artımına icazə verilmir;
- 4.6. “Proseslərin avtomatlaşdırılması”, “gəmiqayırma və gəmi təmiri”, “nəqliyyatda daşınmaların və idarəetmənin təşkili mühəndisliyi (su nəqliyyatı üzrə)”, “gəmi maşın və mexanizmlərinin quraşdırılması, onlara texniki xidmət”, həmçinin Konvensiyaya uyğun olmayan digər dənizçilik ixtisasları üzrə təhsil almış şəxslərə münasibətdə:
- 4.6.1. “proseslərin avtomatlaşdırılması” ixtisası üzrə təhsil almış şəxslər:
- 4.6.1.1. ilk dəfə müraciət edən şəxslərə “gəmi elektriki” sertifikatı (diplomu) verilir;
- 4.6.1.2. əvvəllər verilmiş “gəmi elektriki” və “elektrik mexaniki” sertifikatları (diplomları) yenilənir;
- 4.6.1.3. vəzifə artımına icazə verilmir;
- 4.6.2. “gəmiqayırma və gəmi təmiri” ixtisası üzrə təhsil almış şəxslər:
- 4.6.2.1. ilk dəfə müraciət edən şəxslərə sertifikat (diplom) verilmir;
- 4.6.2.2. əvvəllər köməkçi səviyyə üzrə verilmiş sertifikatlar (diplomlar) yenilənir;
- 4.6.2.3. köməkçi səviyyə üzrə vəzifə artımına icazə verilir;
- 4.6.3. “nəqliyyatda daşınmaların və idarəetmənin təşkili mühəndisliyi (su nəqliyyatı üzrə)” ixtisası üzrə təhsil almış şəxslər:
- 4.6.3.1. ilk dəfə müraciət edən şəxslərə sertifikat (diplom) verilmir;
- 4.6.3.2. əvvəllər köməkçi səviyyə üzrə verilmiş sertifikatlar (diplomlar) yenilənir;
- 4.6.3.3. köməkçi səviyyə üzrə vəzifə artımına icazə verilir;
- 4.6.4. “gəmi maşın və mexanizmlərinin quraşdırılması, onlara texniki xidmət” ixtisası üzrə təhsil almış şəxslər:
- 4.6.4.1. ilk dəfə müraciət edən şəxslərə “növbə motorçusu” sertifikatı (diplomu) verilir;
- 4.6.4.2. əvvəllər verilmiş “növbə motorçusu” və “ixtisaslaşmış motorçu” sertifikatları (diplomları) yenilənir;
- 4.6.4.3. köməkçi səviyyə üzrə vəzifə artımına icazə verilir;
- 4.7. Dənizçilik təhsilinin bitirilməsinə dair dövlət sənədinin əsli təqdim edilmədən (arayış və s. sənəd əsasında) (o cümlədən, Azərbaycan Dövlət Dəniz Akademiyasının tələbələrinə) sertifikat (diplom) verilmir.
5. Xarici ölkələrdə dənizçilik ixtisasları üzrə alınmış ali və ya orta ixtisas təhsili əsasında sertifikatın (diplomun) verilməsi:
- 5.1. Xarici ölkələrdə dənizçilik ixtisasları üzrə ali və ya orta ixtisas təhsili almış şəxslərə sertifikatların (diplomların) verilməsi və yenilənməsi Azərbaycan Respublikası Prezidentinin 2023-cü il 18 avqust tarixli 2306 nömrəli Fərmanı ilə təsdiq edilmiş “Xarici dövlətlərin ali təhsilə aid kvalifikasiyalarının tanınması Qaydaları”na uyğun olaraq verilmiş tanınma şəhadətnaməsi əsasında həyata keçirilir;
- 5.2. Keçmiş SSRİ-nin tərkibində olan dövlətlərin təhsil müəssisələri tərəfindən 1993-cü il yanvarın 1-dək verilmiş dənizçilik ixtisaslarına dair kvalifikasiyalar əsasında sertifikatın (diplomun) verilməsi üçün tanınma şəhadətnaməsi tələb olunmur;
- 5.3. Xarici ölkələrdə alınmış orta ixtisas təhsili əsasında 2023-cü il martın 1-dən əvvəl verilmiş sertifikatların (diplomların) yenilənməsi və vəzifə artımı üçün tanınma şəhadətnaməsi tələb olunmur;
- 5.4. Ali təhsil pilləsinin bakalavriat səviyyəsi və orta ixtisas pilləsi istisna olmaqla, xarici ölkələrdə alınmış digər dənizçilik təhsili (sıravi heyət hazırlığı kursları, peşə təhsili, magistratura təhsili, doktorantura təhsili, ixtisasartırma, təkmilləşdirmə, yenidənhazırlanma, və s.) əsasında:
- 5.4.1. ilk dəfə müraciət edən şəxslərə sertifikat (diplom) verilmir;
- 5.4.2. əvvəllər verilmiş köməkçi səviyyə üzrə sertifikatlar (diplomlar) yenilənir;
- 5.4.3. əvvəllər verilmiş istismar və idarəetmə səviyyələri üzrə sertifikatlar (diplomlar) yenilənmir;
- 5.4.4. köməkçi səviyyə üzrə vəzifə artımına icazə verilir.
6. Sertifikatın (diplomun) verilməsi və yenilənməsi üçün dənizçilik ixtisasları üzrə ali təhsil pilləsinin yalnız bakalavriat səviyyəsi əsas kimi qəbul olunur.
Qeyd:Təlimat Dövlət Dəniz və Liman Agentliyinin 23 dekabr 2024-cü il tarixli 3-27-106/3-2-447/2024 nömrəli Əmri ilə təsdiq edilmişdir.